الله مخلِّفش ولَد!

أبريل 24, 2019 | أبحاث

طبعًا الشائع عنِّنا اننا بنقول ان الله خلِّف ولد، هو عيسى! الاتِّهام ده ظهَر بسبب بِدعَة ظهرت في الجزيرة العربيَّة .. قالت ما معناه ان الله ومريم اتجوِّزوا وخلِّفوا المسيح .. وللأسف الاتهام ده لِزِق فينا كمسيحيِّين بسبب البدعة دي .. مع إن البدعة دي أصلًا مرفوضة من المسيحيِّين نفسُهُم .. مفيش مسيحي بيقول ان الله خلِف ولَد، هو المسيح .. لكن المسيحيين بيستخدموا عبارة تانية توضَّح إيمانهم ..

وزي ما محتاجين كمسيحيِّين نقرا كُتُب غيرنا، بعينيهم .. المسلم كمان محتاج يقرا الكتاب المُقدَّس، بعينين اللي كتبوه .. أي مُسلِم بسيط فاهم الفرق بين السورة المكِّيَّة والسُّورة المدنيَّة .. وفاهم يعني آية مكِّيَّة جُوَّه سورة مدنيَّة، والعكس .. التفسير الصَّح مينفَعش يفصِل الآية عن زمنها وسياقها ومكانها .. المسيحيِّين بيقولوا عن المسيح انه [ابن الله] .. كلمة [ابن الله] مش معناها: إن أب (الله) وأم (مريم) خلِّفوا ابن (المسيح) .. لكن معناها ان المسيح هو [المُعبِّر عن الله] أو [اللي بيشرَح الله] .. سهل جدًّا الله يكتب وصايا وتعليمات للناس في كتاب .. بس لو الله فارق معاه الناس، وفارق معاه العلاقة معاهم .. لا يمكن الله يكتفي بكتاب فيه شويِّة وصايا .. لكن محتاجينه شخصيًّا يتكلِّم، يتصرَّف، يعيش معانا ..

كل الأديان مكتفية بكتاب، فيه وصايا منسوبة لله .. بس الله في المسيحيَّة مكتفاش بالورق، لأننا فارقين معاه .. المسيح مش نبي، الله بعت من خلاله كتاب فيه وصايا .. لكن المسيح هو استعلان شخص الله، لينا .. يبقى جنون وكُفر منِّنا، لما نرفع من شأن إنسان ونخلِّيه إله .. بس مش غريبة على إله بيحب الإنسان، إنه يتنازِل عشانُه .. بصورة يقدر الإنسان يفهمها ويلمسها ويشوفها .. ينفع تعرف [عن] إنسان، من خلال ورقة مكتوب فيها عنه .. لكن عشان تعرفه شخصيًّا، لازم هو بنفسه ييجي ويتكلِّم .. وينفع تعرف [عن] الله، من خلال كتاب فيه وصايا منه .. لكن عشان تعرفه شخصيًّا، لازم هو بنفسه ييجي ويتكلِّم. المحبَّة ملهاش تعريف إلا من خلال فِعل مُكلِّف ..

يبقى مش غريبة على إله بيحب الإنسان انه يتنازل، مهما اتكلِّف. لو عاوز تعرف أكتر ممكن تقرا الكتاب ده: http://kalematallah.com/reading_lib/more/sonofgod/sonofgod.htm

-ديڤيد ويصا

ما معنى اسم صموئيل؟

ما معنى اسم صموئيل؟

أصل صموئيل في العبرية الكلمة العبرية «صموئيل» ترد هكذا שמואל شموايل، وهي كما لو كانت تتكون من...

Share This